यासोक क्याम्पसमा अखिल क्रान्तिकारीका तारामाया लावती निर्वाचित

यासोक, पाँचथर।

पाँचथरको यासोक क्याम्पसमा स्वतन्त्र विद्यार्थी युनियन (स्ववियु) निर्वाचन सम्पन्न भएको छ। मतगणनामा अखिल क्रान्तिकारीकी तारामाया लावती अध्यक्षमा निर्वाचित भएकी छन्। उनले अनेरास्ववियुका मनोज थापालाई १२ मतले पराजित गरेकी हुन्।

क्याम्पसमा कुल १४२ मतदाता रहेकामा ११६ जनाले मतदान गरेका थिए। निर्वाचनमा अखिल क्रान्तिकारी र नेपाल विद्यार्थी संघ (नेविसंघ) गठबन्धन गरेका थिए भने अनेरास्ववियु र पहिचानवादी विद्यार्थी संगठनले संयुक्त रुपमा प्रतिस्पर्धा गरेका थिए।

निर्वाचन परिणामअनुसार अखिल क्रान्तिकारीबाट अध्यक्षमा तारामाया लावती विजयी भइन् भने अनेरास्ववियुकी अन्जु लावती सचिव पदमा निर्वाचित भइन्। कोषाध्यक्ष पदमा अखिल क्रान्तिकारीकी हिमादेवी भण्डारी विजयी भएकी छन्। प्रत्यक्ष तर्फका सदस्यमा सनम खवास (नेविसंघ), मनोज खड्का (अखिल क्रान्तिकारी) र नमुना फेवदिन (नेविसंघ) निर्वाचित भएका छन्। समानुपातिक तर्फ नेविसंघबाट अन्सेल चाम्लिङ, खेमबहादुर कार्की, ममता रिजाल र बिकाश खड्का निर्वाचित भएका छन्।

यसअघि अनेरास्ववियुले स्ववियु जितेको थियो। नव-निर्वाचित विद्यार्थी प्रतिनिधिहरू उत्सव मनाउँदै नारा जुलुस गरेका छन्। युवा नेता अमर आङ्देम्बेले जानकारी दिए।

यसैबीच, मिक्लाजुङ गाउँपालिकास्थित रवि क्याम्पसमा अखिल क्रान्तिकारीले गठबन्धन नगरी एकल प्रतिस्पर्धामै पुनम लावतीको नेतृत्वमा स्ववियु जितेको छ। यस्तै, याङ्वरक गाउँपालिकाको थर्पु क्याम्पसमा अनेरास्ववियुका सुरेश माझीको प्यानल विजयी भइसकेको छ।

फिदिमस्थित पाँचथर बहुमुखी क्याम्पसमा भने मतगणना जारी रहेको निर्वाचन अधिकृत दुर्गा बरालले जानकारी दिएका छन्।